Нумаях пулмасть Тури Юнтапапа Атнаш ялĕнче пурăнакансем туслăх кĕперне хыврĕç. Асăннă ялсенче чăн-чăн чăваш туйĕ кĕрлерĕ.
Иртнĕ канмалли кун Тури Юнтапари Дмитрий Федоров Атнашри Анастасия Семеновăпа çемье чăмăртарĕ. Çамрăксем пурнăç сукмакĕпе пĕр-пĕрне савса, алла-аллăн тытăнса, пĕр-пĕрне ăнланса тата пулăшса утма сăмах пачĕç.
Асăннă ялсенче чăн-чăн чăваш туйĕ кĕрлерĕ. Ĕлĕкхи йăла-йĕркене пăхăнса каччă тата хĕрĕ енчен хăна-вĕрлене савăнтарма та, ырă тĕслĕх кăтартма та пултарчĕç. Кунта Федоровсемпе Семеновсен тÿпине палăртса хăвармалла.
Ашшĕ-амăшĕ икĕ енчен те çамрăк мăшăра чăваш йăли-йĕркипе пил пачĕç. Туй илемне Мăкăр ялĕнчи культура çурчĕ çумĕнчи «Туслăх» фольклор ушкăнĕ тата та капăрлатрĕ. Вĕсем чăваш юрри-такмакĕпе туй халăхне савăнтарса хавхалантарчĕç, аякран килнĕ хăнасене тĕлĕнтерчĕç.
Çамрăк мăшăра чăваш тумĕпе Анаткас Татмăш ялĕнче пурăнакан Алена Владимирова тивĕçтернĕ. Вăл — çĕвĕ тата тĕрĕ ăсти. Илемлĕх хатĕрĕсене те хăйех ăсталать. Федоровсемпе Семеновсен çемйисем пултаруллă ал ĕç ăстине капăр туй ирттерме пулăшнăшăн чĕререн тав тăваççĕ.
Алиса НИКОЛАЕВА