Шкултан вĕренсе тухакансен тĕрĕслев экзаменĕсем вĕçленнĕ. Халĕ вĕсен кăтартăвĕсем килсе пыраççĕ. Пултаруллă çамрăксем, патшалăхăн пĕрлехи экзаменне тĕрлĕ предметпа 100 баллăх тытнипе савăнтараççĕ. Тĕплĕн- рех Канаш тăрăхĕнчи информаципе методика центрĕн ертÿçи Светлана Иванова каласа парать:
– Физика предмечĕпе йĕркелесе ирттернĕ экзамена 100 баллăх çырса Чăваш Енре ултă выпускник палăрнă. Вĕсенчен пĕри – Дарья Алексеева, вăл Катек шкулĕнче вĕреннĕ. Общество пĕлĕвĕпе республикăра виçĕ çамрăк пысăк çитĕнÿ тунă. Çак йышра вара Кира Лачина та пур, вăл Канаш хулинчи 5-мĕш шкулта пĕлÿ илнĕ. Пултаруллă пикесене çак курăмлă çитĕнÿпе саламлатпăр.
