Чылай çĕннине пĕлеççĕ

Чăваш наци музейне йĕркеленĕренпе кăçалхи нарăс уйăхĕн 12-мĕшĕнче 105 çул çитнĕ.
Юлашки пилĕк çулта унта чылай ĕç пурнăçларнă. Сăмахран, çак тапхăрта çĕнĕ икĕ музей уçнă. Пĕри – Куславкка тăрăхĕнчи Сăрпа Хусан хӳтĕлев чиккисене тăвакансене халалланăскер, тепри – Раççейĕн тĕрленĕ карттин музейĕ.
Вĕсем Чăваш наци музейĕн пайĕсем шутланаççĕ. Раççейĕн тĕрленĕ карттин музейне уçни питĕ пĕлтерĕшлĕ пулнине асăнса хăвармалла. Ăна пула ытти регионра пурăнакансем Чăваш Ен пирки чылай çĕннине пĕлеççĕ. Шупашкара килекен хăнасем те асăннă музее кĕмесĕр каймаççĕ. Картта çинче тӳрех хăйсен регионне шыраççĕ. Ăна иртнĕ çулхи çу уйăхĕн вĕçĕнче уçнă. Унтанпа музейпе 40 пин ытла çын паллашнă.