Нарăс уйăхĕн 19-мĕшĕнче Уçырмари Культура çуртĕнче Тăван çĕршыв хÿтĕлевçин кунне халалласа районти фестиваль иртнĕ. Мероприяти Уçырмари вăтам шкулта пуçланнă, унта районти ветерансем винтовкăран тĕл перессипе ăмăртнă. Ăмăртăва районти ДОСААФ председателĕ Викентий Владимиров йĕркелесе пынă.
Тĕл перекенсене палăртнă хыççăн фестивале хутшăннисем Культура çуртне пуçтарăннă. Мероприятие уçнă çĕре район администрацийĕн пуçлăхĕн çумĕ — вĕренÿ управленийĕн ертÿçи Ю. Алексеев, Канаш хулин, Канаш тата Тăвай районĕсен çар комиссарĕ Ю. Барышов, «Афганистан ветеранĕсен Раççейри пĕрлешĕвĕ» Канашри уйрăмĕн председателĕ Г. Николаев, районти ДОСААФ председателĕ В. Владимиров, район администрацийĕн физкультурăпа спорт секторĕн эксперт специалисчĕ А. Павлова, ветерансемпе призывниксем тата çамрăксем хутшăннă.
«Çывхарса килекен уяв чăннипех те мухтавпа патриотизм символĕ шутланать. Вăл пире асаттесемпе аттесен паттăрлăхĕ çинчен аса илтерсе тăрать. Хальхи Раççейĕн салтакĕсемпе офицерĕсем те çĕршыв интересĕсене тивĕçлипе пурнăçласа пыраççĕ», — палăртнă çар комиссарĕ Ю. Барышов пуçтарăннисене çывхарса килекен уяв ячĕпе саламланă май.
Фестивале килнисем районти шкулсем хатĕрленĕ концерт программине курса савăннă.
Антонина ТЯМИНА
Сăн ÿкерчĕкĕ авторăн
