Шăхасан салинчи Ял хуçалăх техникин урамĕнче вырнаçнă çуртсен картишĕсемпе таврари лаптăка хăтлăлатаççĕ. Çак пĕлтерĕшлĕ ĕçсене Чăваш Республикин Пуçлăхĕн ятарлă хушăвĕпе килĕшÿллĕн туса пыраççĕ.
Çурт картишĕсене йĕркене кĕртессипе «Транспортник» тулли мар яваплă пĕрлĕх ĕçченĕсем тимлеççĕ. Подрядлă организаципе ултă миллион ытла тенкĕлĕх муниципаллă контракт килĕшĕвĕ тунă.
Хальхи вăхăтра рабочисем çулăн кивĕ сийне илеççĕ, часах тротуар йĕркелеме тата çĕнĕ асфальт сарма тытăнĕç. Çавăн пекех урамра çутă хатĕрĕсем те вырнаçтарса тухĕç. Палăртнă ĕçсем мĕнле пурнăçланса пынине çак кунсенче район администрацийĕн пуçлăхĕн çумĕ — обществăлла инфратытăм аталанăвĕн пайĕн ертÿçи Екатерина Филиппова паллашнă.
