Чăваш Республикинчи XXV «Чĕнтĕрлĕ чаршав» конкурс пуш уйăхĕн вĕçĕнче иртнĕ.
Тупăшура театрсем хăйсен чи лайăх спектаклĕсене кăтартнă. Конкурса тăратнă ĕçсене сумлă жюри хакланă. Йышра ытти хуларан чĕнсе илнĕ экспертсем те пулнă.
«Чĕнтĕрлĕ чаршав» конкурса хупнине халалланă уяв Вырăс драма театрĕнче иртнĕ. Театр искусствин конкурсĕн çĕнтерӳçисене тата хăнасене культура министрĕн çумĕ Георгий Богуславский, Чăваш Енри театр ĕçченĕсен пĕрлешĕвĕн председателĕ Сергей Павлов саламланă, республикăри театр учрежденийĕсен професси ăсталăхĕ ӳссе пынине, театр искусствин аталанăвне, çитĕнекен ăрăва воспитани парас ĕçе пысăк тӳпе хывнине, артистсем Раççей, тĕнче шайĕнчи конкурссенче хăйсене ăнăçлă кăтартма пултарнине палăртса хăварнă.
