Канаш тăрăхĕнче экологи субботникĕсен икĕ уйăхлăхĕ старт илнĕ. Унпа килĕшÿллĕн вырăнта пурăнакансем тăван тăрăха тирпей-илем кĕртсе пыраççĕ. Çеçпĕлсем вара ку енĕпе уйрăмах пысăк хастарлăх кăтартаççĕ. Халĕ ял территорийĕн ертÿçине Алексей Ананьева сăмах паратпăр:
— Çеçпĕл тăрăхĕнче субботника чи малтан Матьшÿ ялĕнче пурăнакансем пысăк йышпа тухрĕç. Пĕрлехи ĕçе ял старости Венера Константинова хастар йĕркелесе пычĕ. Çынсем çул айккисене çÿп-çапран тасатрĕç, çул хĕррипе хăйсене тĕллĕн ÿсекен йывăç-хунава касса тирпейлерĕç. Анаткас ялĕнче пурăнакансем те айккинче юлмарĕç. Вĕсем çурхи шыв-шур çурса кайнă ял пĕвин пăрăхне тепĕр хутчен вырнаçтарса çирĕплетрĕç. Иртнĕ кану кунĕсенче те хамăр ял территорийĕнче пысăк калăпăшлă субботник йĕркелерĕмĕр. Çак пархатарлă ĕçе çĕртме уйăхĕ пуçланичченех тытса пырăпăр.
