Ыран, çу уйăхĕн 16-мĕшĕнче, Кĕçтук Кольцов поэт çуралнăранпа 110 çул çитет. Çак паллă пулăма Анат Сурăм ялĕнче уйрăмах çÿллĕ шайра кĕтсе илме хатĕрленеççĕ.
Кĕçтук Кольцовăн пичетленмен сăввисем хулăн тетрадь-кĕнекере питĕ нумай упранаççĕ. Поэтăн çуралнă кунĕ тĕлне вăл хăй аллипе çырнă хăш-пĕр сăввисемпе хаçат тусĕсене те паллаштарас терĕмĕр. Çывăх тăванĕсен çемье архивĕнче чылайранпа перекетлĕ упраннă тетрадьре 1931 çулта çырнă сăвă та, 1932-33 çулсенче хайланисем те, Совет Çарĕн-че пулнă чухне Белоруссире çырнисем те, Карели фронтĕнче хайланă сăввисем те пур. Тĕлĕнмелле паха истори докуменчĕ.
Чи пысăк ĕçĕ вара — «972 çул. Дунай çинче» сăвă-поэма. Унта вăл Святослав князь печенегсемпе çапăçнине 125 куплетра сăнарласа парать. Унăн çавăн пекех С. Есенин, К. Фофанов тăрăх çырнă сăввисем те пур.
