Ролик авторне тупса палӑртнӑ

Шупашкарта пурӑнакан 18 ҫулти каччӑна полици тытса чарнӑ, вӑл пилотсӑр вӗҫекен аппаратсем Шупашкара тапӑннине видео ӳкерсе халӑх тетелне вырнаҫтарнӑ.
Тӗнче тетелне вырнаҫтарнӑ ролик авторне часах тупса палӑртнӑ. Каччӑна Шупашкарти 1-мӗш полици участокне илсе килнӗ. Ун тӗлӗшпе административлӑ протокол ҫырнӑ. Каччӑ каҫару ыйтнӑ, никама та кӳрентерме шутламаннине каланӑ – ҫакна видео ӳкернӗ. Административлӑ ӗҫе миравай суд пӑхса тухӗ.
Аса илтеретпӗр, иртнӗ ҫулхи ҫурлан 26-мӗшӗнчен республикӑра БПЛАсем тапӑннине ӳкерме, видеона тӗнче тетелне вырнаҫтарма юрамасть.