Пушартан сыхланма пулăшĕç

Чăваш Енри хăш-пĕр çемьене пушар пирки систерекен хатĕрсем тÿлевсĕр лартса парĕç. Çак хатĕрсене нумай ачаллă çемьесенче, пурнăçри йывăр лару-тăрăва лекнĕ çемьесенче тата социаллă хăрушлăхри çемьесенче вырнаçтарĕç. Пушар пирки систерекен хатĕре (вăл тĕтĕм тухсан сасă кăларса асăрхаттарать) вырнаçтарма республика хыснинчен 1,4 миллион тенкĕ уйăрнă. Чрезвычайлă лару-тăрусен министерствин Чăваш Енри управленийĕ ыйтнипе укçана Улатăр, Красноармейски тата Тăвай округĕсене валеçсе панă. Унччен çакăн пек пулăшăва ытти муниципалитетсем те тивĕçнĕ пулнă.