Совет Союзне нимĕç фашисчĕсем тапăнсан пĕтĕм халăх Тăван çĕршыва хÿтĕлеме çĕкленнĕ. Тăшман аякра пулин те Чăваш Енре те хĕрÿ тапхăр пуçланнă.
1941 çулхи кĕркунне Сăр тăрăхĕпе иртекен оборона линине тума тытăннă. Республика историйĕн- чи чи пысăк строительствăра куллен 100 пин ытла çын, тĕпрен илсен хĕрарăмсем, ватти-вĕтти вăй хунă. Хĕллехи шартлама сивĕсем вăхăтĕнче те ĕç татăлман. Лини 380 çухрăма тăсăлнă, 4 897 000 кубла метр çĕр чавса кăларнă…
Юнкун Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев Чăваш Республикин хальхи истори архивĕ йĕркеленĕ «Халăх астăвăмĕ. Çĕнтерĕве упрар!» акцие хутшăннă май çак çынсен паттăрлăхне аса илни питех те пĕлтерĕшлĕ пулассине палăртнă. «Оборона линийĕн чи пысăк пайĕ Чăваш Ен урлă иртнĕ. Унта пирĕн тăрăхри çынсем вăйне-халне шеллемесĕр тăрăшнă. Вĕсем пирки пирĕн аса илмелле, çамрăк ăрăва каласа кăтартмалла», — тенĕ вăл.
Тылра та Тăван çĕршыва хÿтĕленĕ
