Иртнĕ эрнере округри ял хуçалăх ĕçченĕ-сем хăйсен професси уявне паллă тунă. Агропромышленность комплексĕнче вăй хуракансене Чăваш Республикин транспорт тата çул-йĕр хуçалăхĕн министрĕн çумĕ Юрий Арлашкин тата муниципалитет пуçлăхĕ Сергей Михайлов саламланă.
Вĕсем кăтартусемпе малта пыракансене тĕрлĕ ведомство наградисемпе чысланă, тăрăшулăхĕшĕн тав тунă, аталанупа ăнăçу тата çирĕп сывлăх суннă. Хресчен-фермер хуçалăхĕн ертÿçи Иван Протасов _ Раççей Федерацийĕн Ял хуçалăх министерствин Хисеп грамотине, Киров ячĕллĕ хуçалăхăн тракторист-машинисчĕ Александр Алексеев _ Чăваш Ен Пуçлăхĕн Тав хутне, асăннă хуçалăхăн инженер электрикĕ Николай Белов Чăваш Республикин Ял хуçалăх министерствин Хисеп грамотине илме тивĕçнĕ. Ял хуçалăхĕнче тăрăшакансен пысăк ушкăнне округ администрацийĕн Тав хучĕсемпе наградăланă.
Уявра лайăх кăтартусемпе ĕçлесе пыракан хуçалăхсене те асăнса хăварнă. «Канмаш» агрофирма «Ылтăн кĕркунне _ 2024» Раççей агропромышленность куравĕн конкурсне хутшăнса пахча-çимĕç ÿстерес енĕпе «бронза» медале тивĕçнĕ.
