Юпа уйăхĕн 22-мĕшĕнче Канаш тăрăхĕнчи тĕп вулавăшра уçă калаçу иртнĕ. Çамрăксем унти «Импульс» лапама пуçтарăннă, «Экокарьера _ малашлăх утăмĕ» темăна сÿтсе явнă.
Çак лапама тĕп вулавăшра вулакансен ыйтăвĕсемпе ĕçлекен пай ертÿçи Людмила Чебукова йĕркелесе пырать. Уçă калаçу хальхинче «Манăн пулас экопрофесси» тема тавра пынă. Ăна республикăри Экологи çулталăкне тата профориентацин тĕллевлĕ акцине халалланă пулнă. Мероприятие вырăнти депутат, Раççей çамрăкĕсен пĕрлешĕвĕн Канаш тăрăхĕнчи уйрăмĕн ертÿçи, «Атте тунă» столяр мастерскойне тытса пыракан Сергей Иванов хутшăннă.
Сергей Сергеевич ял бизнесĕ тата шкулти хăйĕн ĕçĕ-хĕлĕ çинче чарăнса тăнă. Вăл наставник ĕçĕ пысăк пĕлтерĕшлĕ пулнине тата харпăр хăй вăхăчĕпе кашни тĕрĕс усă курма пĕлмеллине каланă. Ачасемшĕн мероприяти теми питĕ кăсăклă тата усăллă пулнă. Вĕсем хăнана тĕрлĕрен ыйту панă. «Шкулти агростартап» проект çинчен тĕплĕнрех ыйтса пĕлнĕ.
«Импульс» лапамĕнче сÿтсе явнă тема паянхи кунпа çирĕп килĕшсе тăрать. Çут çанталăка упрасси тата унăн пурлăхĕпе тĕрĕс усă курасси _ кашнин тивĕçĕ. Çут çанталăк тусĕ пулма вара мĕн пĕчĕкрен хăнăхса ÿсмелле.
Людмила ЧЕБУКОВА
