Ҫӗнӗ Шупашкарта районти ветеринари станцийӗн никӗсӗ ҫинче Чӑваш Енри пӗрремӗш блок-модульлӗ хальхи вӑхӑтри ветеринари клиникине уҫнӑ. Кун пирки Чӑваш Республикин Ял хуҫалӑх министерствинче пӗлтернӗ. Ҫӗнӗ ветклиника «Единая Россия» партин «Выльӑх-чӗрлӗх тӗнчине хӳтӗлемелли» проектӗн тӗллевӗсене тивӗҫтерет.
«Ҫӗнӗ Шупашкар хулинче Чӑваш Енре хальхи вӑхӑтри пӗрремӗш блок-модульлӗ ветеринари клиники уҫӑлчӗ. Хальхи ветеринари учрежденине Ҫӗнӗ Шупашкарта районти ветеринари станцийӗн никӗсӗ ҫинче тунӑ», – пӗлтернӗ Чӑваш Енӗн ял хуҫалӑх министрӗ Андрей Макушев.
Чӑваш Енӗн патшалӑх ветслужби ТАСС-а пӗлтернӗ тӑрӑх, станцин йывӑҫ ҫуртне 1961 ҫулта тунӑ, 1996 ҫулта ун ҫумне шлакобетонран пристрой хӑпартнӑ. Анчах лаптӑк ҫитменлӗхӗ сыхланса юлнӑ: ветеринари врачӗсем хӗсӗк условисенче ӗҫленӗ, чӗрчунсемпе вӗсен хуҫисен час-часах урамра черет кӗтме тивнӗ. Ведомство пӗлтернӗ тӑрӑх, ҫӗнӗ ҫуртра операци блогӗ, кӗтмелли зал тата хӑнасене йышӑнмалли пӳлӗм туннӑ, ветеринари-санитари экспертизин, ультрасасӑллӑ диагностика тата рентгенографи кабинечӗсене йӗркеленӗ. Ҫӗнӗ учреждени пахалӑхлӑ диагностика тума, сиплеме, профилактика мероприятийӗсене тата ветеринарипе санитари экспертизине туса ирттерме мӗн кирлине пурне те шута илнине палӑртнӑ.
«Ӗлӗк станцин майӗсем лаптӑкӗпе чикӗленнӗ, халӗ специалистсене ӗҫлеме тата хӑнасене чӗрчунсемпе йышӑнма лайӑх условисем йӗркеленӗ. Клиникӑра Чӑваш Енре чӗрчунсем валли хальхи вӑхӑтри иккӗмӗш операци пӳлӗмӗ пулса тӑчӗ», – тенӗ Чӑваш Ен патшалӑх ветслужбин ертӳҫи Александр Шакин.
Партин регионти уйрӑмӗ пӗлтернӗ тӑрӑх, «Единая Россиян» халӑх программине Чӑваш Енри 13 муниципалитетран ветеринарипе тата выльӑх-чӗрлӗхе усрас ыйтусемпе 250 ытла сӗнӳ килнӗ. Сӗнӳсем, сӑмахран, чӗрчунсем валли приют тумалли тата вӗсене вӑхӑтлӑха тытмалли пунктсем йӗркелемеллипе те ҫыхӑннӑ пулнӑ.
