Энтрияль шкулӗ 130 ҫулта

Энтрияль шкулӗн историйӗ 1896 ҫулхи октябрь уйӑхӗнче пуҫланнӑ. Вӑл 130 ҫул хушши ялти вӗренӳ, воспитани тата культура пурнӑҫӗн тӗп вырӑнӗ пулса тӑнӑ. Ҫак ҫулсенче шкултан темиҫе ӑру вӗренсе тухнӑ. Унта ачасене пӗлӳ панӑ, талантсене уҫма тата хӑйсен ҫулне тупма пулӑшнӑ. Паянхи кун шкулта 124 вӗренекен вӗренет, 16 педагог ӗҫлет. Вӗсем ҫамрӑксене вӗрентсе ӳстерес мухтавлӑ йӑла-йӗркене малалла тӑсаҫҫӗ.
Шкул аталанать, ҫӗнелет, ачасем валли ҫӗнӗ майсем уҫса парать. Ҫурта тӗпрен юсаса ҫӗнетнӗ, территорие илемлетнӗ, ҫӗнӗ котельнӑй тунӑ, 2026 ҫулта хоккей площадки туса панӑ. Кунта спорт секцийӗсемпе пултарулӑх кружокӗсем ӗҫлеҫҫӗ, ял ҫыннисем тӑрӑшнипе йӗркеленӗ «Астӑвӑм управҫи» музей тӑван ен историне шанчӑклӑн упрать.
Педагогсемпе вӗренекенсем шкула муниципалитет тата республика шайӗнче тивӗҫлӗ кӑтартаҫҫӗ, вӗренӳ, спорт тата пултарулӑх енӗпе ҫитӗнӳсем тӑваҫҫӗ. Ҫак ҫитӗнӳсенче учительсен нумай ӑрури пархатарлӑ ӗҫӗ, ашшӗ-амӑшӗ пулӑшни тата тӑван шкула юратни тӗпре.
Энтрияль шкулне 130 ҫул тултарнӑ ятпа саламлатпӑр! Педагогсен коллективне хавхалану, профессире ҫӗнӗ ҫитӗнӳсем, вӗренекенсене – лайӑх кӑтартусем сунатпӑр. Шкул малашне те хӑйӗн йӑли-йӗркине упраса пытӑр, аталантӑр, ӗмӗтсем ҫуралакан тата пысӑк майсем уҫӑлакан вырӑн пулса юлтӑр.