Хитре те хăтлă шкулта пĕлÿ илме те кăмăллă. Çавна май республикăри шкулсене тĕпрен юсаса çĕнетесси йăлана кĕчĕ тесен те юрать. Канаш муниципалитет округĕнче те юлашки çулсенче чылай шкула çĕнĕ сăн кĕртрĕç.
«Шкул вĕренÿ тытăмĕсене модернизацилесси» программăпа килĕшÿллĕн Вăтапуç вăтам шкулĕнче юсав ĕçĕсем пыраççĕ. Хальхи вăхăтра шкула мал енчен çĕнетеççĕ, çурт тăррине ылмаштараççĕ.
Шкулсене юсамалли программа «Вĕренÿ аталанăвĕ» патшалăх программипе килĕшÿллĕн пурнăçланать. Ăна РФ Çут ĕç министерстви РФ Строительство министерствипе пĕрле пурнăçа кĕртет. Ку программа тăрăх юсав тунипе çеç мар, шкула валли çĕнĕ хатĕр-хĕтĕрсем те туянаççĕ.